ہندوستان اور پاکستان سمیت دنیا بھر میں سالِ نو کا رنگا رنگ استقبال

دنیا بھر میں نئے سال کو خوش آمدید کہنے کے لیے تقاریب منعقد ہوئیں، 2019ء کا سب سے پہلا استقبال نیوزی لینڈ کے شہر آکلینڈ میں کیا گیا۔آکلینڈ میں سال نو کے موقع پر ہزاروں شہریوں نے 2018ء کو الوداع کہا اور سحرانگیز آتش بازی کے ساتھ 2019ء کی آمد کا جشن منایا۔ موسیقی کی دھنوں پر رقص کیا گیا اور پُرتعیش ہوٹلوں میں لذیذ پکوان سے مہمانوں کی تواضع کی گئی۔نیوزی لینڈ کے بعد آسٹریلیا میں جشنِ سالِ نو منایا گیا جس کے لیے سڈنی میں “ہاربر بریج ” کو دلہن کی طرح سجایا گیا اور موسیقی کی دھن پر شاندار آتش بازی کی گئی۔ آسٹریلیا کے بعد جاپان، چین اور انڈونیشیا میں نئے سال کا جشن اپنے اپنے روایتی طریقوں سے منایا گیا۔
فرانس اور برطانیہ میں بھی سحرانگیز آتش بازی کے انتظامات کیے گئے، ہوٹلوں میں خصوصی تقاریب کا انعقاد کیا گیا۔ میوزیکل کنسرٹ کی تمام ٹکٹیں فروخت ہوگئیں۔ شہر کے اہم مقامات پر آتش بازی کے مظاہرے کیے گئے، بھارت، بنگلا دیش اور پاکستان کے شہری بھی سال نو کو خوش آمدید کہنے کے لیے بے چین رہے۔سب سے آخر میں امریکا کے شہر نیو یارک میں سال نو کا استقبال پُر جوش طریقے سے کیا جائے گا۔ ٹائم اسکوائر پر کاؤنٹ ڈاون شروع ہوگا اور نیو ایئر ایو بال کو روشن کیا جائے گا اور آتش بازی کے دلفریب نظاروں کے ساتھ نئے سال کا آغاز کیا جائے گا۔نیویارک میں ہرسال کی طرح اس سال بھی ’نیوایئر بال ڈروپنگ تقریب‘ اہم ترین روایت کے طور پر برقرار رہے گی، 12 ہزار پاؤنڈ وزنی بال کی تیاری میں مختلف سائز کے 2 ہزار 600 کرسٹل ٹرائی اینگلز استعمال کیے گئے جسے ’’گفٹ آف ہارمونی‘‘ یعنی ہم آہنگی کا تحفہ کا نام دیا گیا ہے۔
قومی راجدھانی دہلی میں مختلف مقامات پر نئے سال کو خوش آمدید کہنے کے لیے مختلف تقاریب منعقد ہوئیں، اس تقریب میں لوگوں نے دل کھول کر موج مستی کی۔ حالانکہ دہلی میں آج سردی کافی تھی۔ پھر بھی مختلف مقامات پر لوگوں کی بھیڑ دیکھنے کو ملی۔ مختلف مقامات پر لوگوں نے ایک دوسرے کو گلے لگا کر نئے سال کی مبارکباد دی۔

Leave a Reply

Your email address will not be published. Required fields are marked *

Pin It on Pinterest